Sunday, May 31, 2009

فكرة و كلمة


مصريتنا وطنيتنا حماها الله..في حد ميعرفش الأعنية دي؟ معتقدش كتير بس يمكن الجيل الجديد جيل الالفية الجديدة ميكونوش سمعوها.. عامة الفكرة في اللي هقوله مالوش علاقة بالأغنية.. لي علاقة بالمصرية..الناس كلها دلوقتي بتتكلم عن الهوية المصرية المتهدمة و الناس اللي مبقوش يتكلمو عربي وانه المصريين مبقاش عندهم انتماء ..الخ الخ الخ .. اللستة طويلة جدا

بس السؤال يعني ايه وطنية؟ أكيد مش هتغنولي أغنية يعني ايه كلمة وطن بتاعة كوكي كاك !

الوطنية هو شعور بيبقي جوا الواحد , احساس بالفخر انه بينتمي للبلد دي.. هتقولوا مبقاش في انتماء هقولكم ان ده امر طبيعي.. واحد و واحد يساوي اتنين .. الناس كلها الحمد لله مبقاش عندها غير النقد و النقد و النقد و النقد و كمان نقد..

طب حد فكر في فكرة لطيفة جدا علي سبيل التغيير يعني من باب الملل و يقترح حل ؟ لمشكلة صغيرة حتي؟

لللأسف لأ! ليه؟ لأنه أحنا بنحب اللت و العجن و نشتم في ده و نتارياء علي ده و ننقد ده و نطلع فيه ابو ام القطط اللي فطسوا من 3000 سنة..وماتو و شبعو موت...

طب بصة لقدام ... يقلك الدنيا سودة ! طب حاول تبيضها! يقولك و انا مالي ! الله ! امال بتتأمر ليه؟

نص الناس اللي بتشتكي و متذمرة في الحقيقة كمان سلبية ... ايوا هي دي الكلمة اللي عايز امسك فيها .. سلبية سلبية سلبية سلبية .. معلش لبانة و عاجباني..

احنا عايشين علي حضارة 7000 سنة فاتو..طب مش مكسوفين ...اننا عايشين علي قفا الناس دي اونطة؟

عايزين كل حاجة علي الجاهز .. عايزين ننقد ونترياء وخلاص والطف ما في الموضوع بقي اننا بنيجي نقارن نفسنا بالدول المتقدمة.. اللي هو اكننا عملنا اللي هما عملوه وزيادة...

حد عمره سمع عن كلمة حل؟ حل يحل حلولا! سهلة ! لا مش سهلة و محتاجة مجهود و محتاجة مخ و محتاجة وقت !

طب احنا ورانا ايه؟ ايوا عارفك ياللي ورا هتقولي محنا في حاجات مش هنقدر نحلها..بالظبط ده صحيح بس في حاجات كتير ممكن تحلها .. ممكن نبطل نغش بعض او نضحك علي بعض ! هل لانه اتضحك عليك فا ده مبرر انك تضحك علي الناس و تغشهم؟ أكيد لأ..

مينفعش اطلب من ربنا انه يصلح حالي و يفتحها في وشي و اول منزل من البيت اقوم ضاحك علي حد او ناصب عليه و اقول مانا بيتعمل فيا !

طبعا النظام و ما يحيط بينا بيؤثر فينا ... بس احنا كمان ممكن نأثر فيه.. في بلاد اتمحت واصبحت دول قوية و غنية..

جميل ان يكون عندنا الروح النقدية .. بس مع الروح دي لازم يكون في شئ من البالوظة في دمغاتنا نفكر بيها.. يعني ما ينفعش اجي لمحمد و اقوله " يا محمد انت فيك و فيك و فيك و فيك !" و سلام عليكو! يا فرحتي بالأضافة!

لأ المفروض اجي لمحمد و أقوله " يا محمد فيه كيت و كيت و كيت و المفروض كذا و ممكن تعمل كذا و تساوي كذأ"

مش كله ضرب مفيش شتيمة !

التغير مش في اللبس و الموضة و العربية و الشغل.. التغير لازم يكون في الفكر

صباحكم أفكار سعيدة انشاء الله!

No comments:

Post a Comment